1. ድሕሪዚ ሶፋር ናዕማዊ ኸምዚ ኢሉ መለሰ፡

2. ነዚ ብዝሒ ዘረባዶ ምላሽ ኣይኪወሀቦን እዩ፧ ወይስ ለፍላፊ ሰብዶ ኺጸድቕ እዩ፧

3. እዚ ምሕባንካዶ ንሰብ ስቕ ኬብሎ እዩ፧ ኣላጊጽካስ ዜሕፍረካ ሰብዶ የልቦን፧

4. ንስኻውን፡ ትምህርተይ ቅኑዕ እዩ፡ ኣብ ዓይንኻውን ንጹህ እየ፡ ትብል አሎኻ።

5. ኣየ፡ ኣምላኽያ እንተ ዚዛረብ፡ ከናፍሩ ኸፊቱ እንተ ዚመልሰልካ፡

6. ናይ ጥበብ ምስጢራት ካብቲ ዘሎ ዕጽፊ ምዃኑ እንተ ዚገልጸልካ፡ ንገሊኡ ኣበሳኻ ኸም ዚርስዖ፡ መስተብሀልካ ኔርካ።

7. ንመዓሙቚ ኣምላኽዶ ኸተቚሮ፡ ንምልኣት እቲ ዂሉ ዚኽእልሲ ኸተቚሮ ትኽእል ኢኻ፧

8. ካብ ሰማይ ልዕል ይብል፡ እንታይ ክትገብር ኢኻ፧ ካብ ሲኦል ይዐምቚ፡ እንታይ ክትፈልጥ ኢኻ፧

9. ስፍሩ ኻብ ምድሪ ይነውሕ፡ ካብ ባሕሪውን ይሰፍሕ እዩ።

10-11. ንሱስ ንኸንቱነት ሰብ ይፈልጦ፡ ንዓመጻ ኸኣ ሃሰስ ከይበለ ይረኽቦ እዩ እሞ፡ ንሱ እንተ ሐለፈ፡ እንተ ዐጸወ፡ ኣብ ፍርዲ እንተ ኣከበ፡ መን እዩ ዚኽልክሎ፧

12. ግናኸ ዓሻ ሰብ ምስትውዓል የብሉን፡ እወ፡ ሰብ ከም ዒሉ ኣድጊ በረኻ እተወልደ እዩ።

13. ልብኻ እንተ ኣዳሎኻ፡ ኣእዳውካውን ናብኡ እንተ ዘርጋሕካ፡

14. ኣብ ኢድካ ዓመጻ እንተሎ፡ ኣርሕቆ፡ ኣብ ድንኳንካውን ግፍዒ ኣይተስፍር።

15. ሽዑ ንገጽካ ብዘይ ሕፍቲ ኸተልዕሎ፡ ጽኑዕ ክትከውን ኣይክትፈርህን ድማ ኢኻ።

16. ሽዑስ ንመከራኻ ኽትርስዖ፡ ከም ዝሐለፈ ውሒዝ ክትዝክሮ ኢኻ።

17. ህይወትካ ኻብ ቀትሪ በሊጻ ትበርህ፡ ጸልማት እኳ ኸም ወገግታ ብጊሓት ኪኸውን እዩ።

18. ተስፋ አሎ እሞ፡ ክትሀድእ፡ ናብ ዙያኻ ኣማዕዲኻ ብህድኣት ክትግምሰስ ኢኻ።

19. ዜፍርህ ዜብልካ በጥ ክትብል፡ ብዙሓትውን ሞገስካ ኺደልዩ እዮም።

20. ኣዒንቲ ረሲኣን ግና ይስልምታ፡ መህደሚ የብሎምን፡ ተስፋኦም ከኣ ብምሕላፍ እስትንፋሶም እዩ።

Chap 10
Chap 12