Tools 1. ነቶም ኵሉ ውግእ ከነኣን ዘይፈለጡ ዘበሉ እስራኤልሲ እግዚኣብሄር ብኣታቶም ኪፍትኖም ኢሉ ዝሐደጎም ህዝብታት እዚኣቶም እዮም፡

Tools 2-3. ሓሙሽቲኦም ሹማምቲ ፍልስጥኤማውያንን ኵሎም ከነኣናውያንን ሲዶናውያንን፡ እቶም ኣብ ከረን ሊባኖስ፡ ካብ ከረን በዓል-ሔርሞን ክሳዕ መእተው ሓማት ዚነብሩ ሃዋውያንውን፡ እዚ፡ እቶም ወለዶ ደቂ እስራኤል፡ ምናዳ እቶም ቀደም ውግእ ዘይፈለጡ ዘበሉ፡ ውግእ ተማሂሮም ምእንቲ ኺፈልጡ ጥራይ እዩ።

Tools 4. እቲ ነቦታቶም ብሙሴ ዝአዘዞም ትእዛዛት እግዚኣብሄር ዚሰምዑ እንተ ዀይኖም ምእንቲ ኺፈልጥሲ፡ እዚኣቶም ንምፍታን እስራኤል ነበሩ።

Tools 5. ደቂ እስራኤል ኣብ ማእከል ከነኣናውያንን ሔታውያንን ኣሞራውያንን ፈረዛውያንን ሃዋውያንን ይቡሳውያንን ተቐመጡ።

Tools 6. ኣዋልዶም ከኣ ኣንስቲ ኪዀናኦም ወሰዱ፡ ኣዋልዶም ድማ ነወዳቶም ሀቡ፡ ንኣማልኽቶምውን ኣገልገልዎም።

Tools 7. ደቂ እስራኤል ከኣ ኣብ ቅድሚ እግዚኣብሄር ክፉእ ዘበለ ገበሩ፡ ንእግዚኣብሄር ኣምላኾም ረሲዖም ድማ፡ ንበዓላትን ንኣስታርቴታትን ኣገልገሉ።

Tools 8. ስለዚ ዅራ እግዚኣብሄር ኣብ እስራኤል ነደደ እሞ፡ ኣብ ኢድ ዅሻን-ሪሻታይም ንጉስ ኣራም-ነሃራዪም ሸጦም። ደቂ እስራኤል ድማ ንዅሻን-ሪሻታይም ሾሞንተ ዓመት ተገዝእዎ።

Tools 9. ግናኸ ደቂ እስራኤል ናብ እግዚኣብሄር ተማህለሉ፡ እግዚኣብሄር ድማ ንደቂ እስራኤል ዜድሕኖም መድሓኒ ዖትኒኤል ወዲ ቄናዝ፡ ንእሽቶ ሓዉ ንካሌብ፡ ኣተንስኣሎም።

Tools 10. መንፈስ እግዚኣብሄር ኣብ ልዕሊኡ ነበረ እሞ፡ ንእስራኤል ይፈርድ ነበረ። ኪዋጋእ ከኣ ወጸ፡ እግዚኣብሄር ድማ ንኪሻን-ሪሻታይም ንጉስ ኣራም ኣብ ኢዱ ኣሕሊፉ ሀቦ። ኢዱ ኸኣ ንኩሻን-ሪሻታይም ሐየለቶ።

Tools 11. እታ ሃገርውን ኣርብዓ ዓመት ዐረፈት። ዖትኒኤል ወዲ ቄናዝ ከኣ ሞተ።

Tools 12. ደቂ እስራኤል ድማ መሊሶም ኣብ ቅድሚ እግዚኣብሄር ክፉእ ዘበለ ገበሩ። ኣብ ቅድሚ እግዚኣብሄር ክፉእ ስለ ዝገበሩ ኸኣ፡ እግዚኣብሄር ንዔግሎን ንጉስ ሞኣብ ኣብ ልዕሊ እስራኤል ኣበርትዖ።

Tools 13. ንደቂ ኣሞንን ኣማሌቅን ናብኡ ኣኽተቶም ከይዱ ኸኣ ንደቂ እስራኤል ሰዐሮም፡ ንኸተማ ተምሪውን ሐዝዋ።

Tools 14. ደቂ እስራኤል ድማ ንዔግሎን ንጉስ ሞኣብ ዓሰርተው ሾሞንተ ዓመት ተገዝእዎ።

Tools 15. ደቂ እስራኤል ግና ናብ እግዚኣብሄር ተማህለሉ፡ እግዚኣብሄር ድማ ኤሁድ ወዲ ጌራ፡ ብንያማዊ፡ ዓኼላይ ሰብኣይ፡ መድሓኒ ኣተንስኣሎም። ደቂ እስራኤል ከኣ ናብ ዔግሎን ንጉስ ሞኣብ ብኢዱ ገጽ በረኸት ሰደዱ።

Tools 16. ሽዑ ኤሁድ ክልተ ዝኣፉ እመት ዝምንዋሓ ሴፍ ገይሩ ኣብ ትሕቲ ኽዳኑ ኣብ የማናይ ሕቜኡ ዐጠቓ።

Tools 17. እቲ ገጽ በረኸት ንዔግሎን ንጉስ ሞኣብ ኣቕረበሉ፡ ዔግሎን ድማ ኣዝዩ ኸሪሹ ነበረ።

Tools 18. ኰነ ኸኣ፡ ነቲ ገጽ በረኸት ኣቕሪቡ ምስ ፈጸመ፡ ነቶም ነቲ ገጽ በረከት ጾይሮም ዝነበሩ ህዝቢ ሰደዶም።

Tools 19. ንሱ ግና ካብታ ኣብ ጊልጋል ዘላ ስፍራ ምስልታት ተመሊሱ፡ ዎ ንጉስ፡ ሕቡእ ነገር ዝነግረካ አሎኒ፡ በሎ። ንሱ ኸኣ፡ ስቕ በል፡ በሎ። እቶም ምስኡ ደው ኢሎም ዝነበሩ ዅሎም ከኣ ካብኡ ወጹ።

Tools 20. ኤሁድ ድማ ናብኡ አተወ፡ ንሱ ኸኣ ኣብታ ንእኡ ንበይኑ ጥራይ ዝነበረት ላዕለይቲ ቤት ሓጋይ ኮፍ ኢሉ ነበረ። ኤሁድ ድማ፡ ንኣኻ ዝነግረካ ቓል ኣምላኽ አሎኒ፡ በሎ። ንሱ ኸኣ ካብ መንበሩ ተንስኤ።

Tools 21. ኤሁድ ድማ ጸጋመይቲ ኢዱ ሰዲዱ ነታ ሴፍ ካብ የማነይቲ ሕቜኡ መሲቱ ናብ ከብዱ ሸኸተሉ።

Tools 22. ድሕሪ እታ ሴፍ ድማ ጋይማ አተወ፡ ነታ ሴፍ ካብ ከብዱ ኣየውጽኣን እሞ ስብሒ ኸደና፡ ብድሕሪኡ ኸኣ ወጸት።

Tools 23. ሽዑ ኤሁድ ናብቲ ደገ ቤት ወጸ፡ ብድሕሪኡ ድማ ነቲ መዓጹ እታ ላዕለይቲ ቤት ዐጽዩ ሸጐሮ።

Tools 24. ንሱ ምስ ወጸ፡ እቶም ገላዉ መጺኦም ረአዩ፡ እንሆ ኸኣ፡ መዓጹ እታ ላዕለይቲ ቤት ተሸጒሩ ነበረ እሞ፡ ርግጽ ኣብ ሕልፍኚ ቤት ሓጋይ ኰይኑ ጕዳዩ ይገብር አሎ፡ ከኣ በሉ።

Tools 25. ክሳዕ ዚሽገሩ ተጸበዩ፡ እንሆ፡ ንሱ መዓጹ እታ ላዕለይቲ ቤት ኣይከፈተን እሞ፡ መኽፈቻ ወሲዶም ከፈትዎ፡ እንሆ ድማ፡ ጐይታኦም ሞይቱ ኣብ ምድሪ ወዲቑ ነበረ።

Tools 26. ኤሁድ ግና በቲ ምድንጓዮም ኣምለጠ፡ ናብ ክንየው ስፍራ ምስልታት ሐሊፉ ናብ ሰዒራ ኣምለጠ።

Tools 27. ኰነ ኸኣ፡ ምስ አተወ፡ ኣብ ከረን ኤፍሬም መለኸት ነፍሔ፡ ደቂ እስራኤል ድማ፡ ንሱ ቐቅድሚኦም ኰይኑ፡ ምስኡ ኻብ ከረን ወረዱ።

Tools 28. ንሱ ድማ፡ እግዚኣብሄር ንሞኣባውያን፡ ጸላእትኹም፡ ኣብ ኢድኩም ሂቡኩም እዩ እሞ፡ ስዐቡኒ፡ በሎም። ደድሕሪኡ ኸኣ ወረዱ፡ ነቲ ንሞኣብ ዜብል መሳገሪታት ዮርዳኖስ ሐዝዎ፡ ንሓደ ሰብ እኳ ኺሐልፍ ኣይሐደጉን።

Tools 29. በታ ጊዜ እቲኣ ኻብ ሞኣብ ዓሰርተ ሽሕ ዚአኽሉ ሰብ ቀተሉ፡ ኵሎም ድልዱላት፡ ኩሎምውን ጀጋኑ ሰባት ነበሩ። ሓደ ሰብ እኳ ኣየምለጠን።

Tools 30. ሞኣብ ከኣ በታ መዓልቲ እቲኣ ኣብ ትሕቲ ኢድ እስራኤል ተዋረደ። እታ ሃገር ከኣ ሰማንያ ዓመት ዐረፈት።

Tools 31. ብድሕሪኡ ድማ ሻምጋር ወዲ ዓናት ነበረ፡ ንሱ ብስላዕ ብዕራይ ገይሩ ሹድሽተ ሚእቲ ፍልስጥኤማውያን ቀተለ፡ ንሱውን ንእራኤል ኣድሐኖም።