1. ኤፍሬም ንፋስ ይምገብ፣ ደድሕሪ ንፋስ ምብራቕ ከኣ ይስዕብ፣ ኵሉ መዓልቲ ሓሶትን ዓመጻን የብዝሕ፣ ምስ ኣሶር ኪዳን ይኣትዉ፣ ናብ ግብጺውን ዘይቲ ይወስዱ።

2. እግዚኣብሄርሲ ምስ ይሁዳውን ነገር አለዎ፣ ንያእቆብ ከኣ ከም መጠን መገዱ ኪቐጽዖ፣ ከም መጠን ግብሩ ድማ ኪፈድዮ እዩ።

3. ኣብ ከርሲ ኣዲኡ ኸሎ ንሓዉ ብዅርዅሪኡ ሐዞ፡ ብምብርታዑ ኸኣ ምስ ኣምላኽ ተቓለሰ።

4. ምስ መልኣኽ ተቓለሰ እሞ ኣሰነፈ፣ በኸየ፣ ለመኖ ኸኣ፣ ኣብ ቤት-ኤል ረኸቦ፣ ኣብኡውን ተዛረበና።

5. ንሱ እግዚኣብሄር ኣምላኽ ሰራዊት፣ ስም መዘከርታኡ ድማ እግዚኣብሄር እዩ።

6. እምበኣርሲ ናብ ኣምላኽካ ተመለስ፣ ምሕረትን ፍርድን ሐሉ፣ ኵሉ ጊዜ ብኣምላኽካ ተስፋ ግበር።

7. ከንኣናዊ እዩ፣ ኣብ ኢዱ ሓሳዊ ሚዛን አለዎ፣ ምጥዋይ ይፈቱ።

8. ኤፍሬም ከኣ፣ ኣነ ሀብተምኩ፣ ገንዘብ ኣጥሬኹ፣ ኣብ ኵሉ ጻዕረይ ሓጢኣት ዚኸውን ኣበሳ ኣይርከበንን፣ በለ።

9. ኣነ ኻብ ሃገር ግብጺ ጀሚረ እግዚኣብሄር ኣምላኽካ እየ፣ ከምቲ ብመዓልቲ በዓል ከም ብሓድሽ ኣብ ድንኳናት ከንብረካ እየ።

10. ንነብያት ከኣ ተዛረብኩ፣ ራእይ ድማ ኣብዛሕኩ፣ ብነብያት ገይረ ምስላታት ነገርኩ።

11. ጊልዓድ ዓመጻ እንተ ዀነ፣ ከንቱነት ጥራይ እዮም። ኣብ ጊልጋል ዝራብዓት ይስውኡ፣ መሰውኢታቶም ከኣ ኣብ ነግሒ ግራት ከም እተዀመረ ኣእማን ኪኸውን እዩ።

12. ያእቆብ ናብ ሃገር ኣራም ሀደመ፣ እስራኤል ድማ ምእንቲ ሰበይቲ ተገዝኤ፣ ምእንቲ ሰበይቲ ኸኣ ጓሳ ዀነ።

13. ግናኸ እግዚኣብሄር ንእስራኤል ብኢድ ነብዪ ካብ ግብጺ ኣውጽኦ፣ ብኢድ ነብዪ ኸኣ ሓለዎ።

14. ኤፍሬም ኣምሪሩ ኣቘጥዖ፣ ስለዚ ጐይታኡ ደሙ ኣብ ልዕሊኡ ኼውርደሉ፣ ጸርፉውን ኣብ ልዕሊኡ ኪመልሰሉ እዩ።

Chap 11
Chap 13