Tools 1. ሙሴ፣ እቲ ናይ ኣምላኽ ሰብ፣ ቅድሚ ሞቱ ንደቂ እስራኤል ዝባረኾም በረኸት እዚ እዩ።

Tools 2. በለ ድማ፣ እግዚኣብሄር ካብ ሲና መጸ፣ ካብ ሰዒር ድማ ተላዕለሎም፣ ካብ ከረን ጳራን ኣንጸባረቐ፣ ካብ ኣእላፋት ቅዱሳን መጸ፣ ካብ የማናዩ ናይ ሕጊ ሓዊ ወጸሎም።

Tools 3. እወ፣ ንሱ ንህዝብታት የፍቅሮም፣ ኵሎም ቅዱሳኑ ኣብ ኢድካ እዮም፣ ኣብ እግርካ ይቕመጡ፣ ካብ ቃላትካ ድማ ይቕበሉ።

Tools 4. ሙሴ ኸኣ ሕጊ፣ ርስቲ ማሕበር ያእቆብ፣ ኣዘዘና።

Tools 5. ሓላቑ ህዝቢ፣ ነገዳት እስራኤል ዅሎም ብሓደ ምስ ተኣከቡ፣ ንሱ ኣብ ይሹሩን ንጉስ ነበረ።

Tools 6. ሮቤል ይንበር፣ ኣይሙት፣ ሰቡ ግና ሒደት ይኹኑ።

Tools 7. ንይሁዳ ኸኣ እዚ እዩ፣ በለ ድማ፣ ዎ እግዚኣብሄር፣ ቃል ይሁዳ ስማዕ፣ ናብ ህዝቡ ከኣ ኣእትዎ፣ ኣእዳዉ ይጽንዓሉ፣ ካብ ተጻረርቱ ረዳኢ ኹኖ።

Tools 8. ብዛዕባ ሌዊ ድማ በለ፣ ቱሚምካን ኡሪምካን ነቶም ሕያዎት ሰብካ እዮም፣ ነቶም ኣብ ማሳ ዝፈተንካዮም፣ ነቶም ኣብ ማይ መሪባ እተረኸራኸርካዮም፣

Tools 9. ብዛዕባ ኣቦኡን ኣዲኡን፣ ኣይርኤኽዎምን፣ ዝበለ፣ ነሕዋቱ ኣየለለዮምን፣ ንደቁ ኸኣ ኣይፈለጦምን። ቃልካ ሐልዮም እዮም እሞ፣ ኪዳንካ ኣጽንዑ።

Tools 10. ንያእቆብ ፍርድታትካ፣ ንእስራኤል ድማ ሕግኻ ኺምህሩ፣ ዕጣን ናብ ኣፍንጫኻ፣ ምሉእ ዚሐርር መስዋእቲውን ኣብ መሰውኢኻ ኬቕርቡ እዮም።

Tools 11. ዎ እግዚኣብሄር፣ ሓይሉ ባርኽ ግብሪ ኢዱ ኸኣ ተቐበል። መሊሶም ከይትንስኡስ፣ ሕቘ ቕቶም ዚጸልእዎ መጻርርቱ ስበር።

Tools 12. ብዛዕባ ብንያም በለ፣ ፍቁር እግዚኣብሄር ምስኡ ብህድኣት ኪነብር እዩ፣ ምሉእ መዓልቲ የጽልሎ፣ ኣብ መንጎ መንኩቡ ድማ ይሐድር።

Tools 13. ብዛዕባ ዮሴፍ ድማ በለ፣ ምድሩ ብእግዚኣብሄር እተባረኸት ትኹን፣ በቲ ኽቡር ናይ ሰማይ ነገርን ብኣውልን፣ በቲ ኣብ ታሕቲ ንቡር ዘሎ መዓሙቚ፣

Tools 14. በቲ ኽቡር እቶት ጸሓይ፣ በቲ በዋርሕ ዚበቊል ክቡር ነገር ከኣ።

Tools 15. በቲ ናይ ጥንታውያን ኣኽራን ዝሔሸ ነገር፣ በቲ ናይ ዘለኣለም ኵርባታት ድማ ዝኸበረ ነገር፣

Tools 16. በቲ ናይ ምድሪ ኽቡር ነገርን ምልኣታን፣ በቲ ኣብ ኣሻዅ ቈጥቋጥ ዝነበረ ሞገስውን፣ እዚ ኣብ ርእሲ ዮሴፍ፣ ኣብ መንበስበስታ እቲ ኻብ ኣሕዋቱ እተፈለየ ይምጻእ።

Tools 17. ግርማ እቲ በዅሪ ኣርሓኡ ናቱ እዩ፣ ኣቕርንቱ ኣቕርንቲ ጎባይ እዩ፣ ብእኡ ገይሩ ንዅሎም ህዝብታት ክሳዕ ወሰናት ምድሪ ይወግኦም፣ እዚኣቶም ኣእላፋት ኤፍሬምን ኣሽሓት ምናሴን እዮም።

Tools 18. ብዛዕባ ዛብሎን ድማ በለ፣ ኣታ ዛብሎን፣ ብምውጻእካ ባህ ይበልካ። ኣታ ይሳኮርውን ኣብ ድንኳናትካ።

Tools 19. ሃብቲ ባሕርን ኣብ ሑጻ እተሐብኡ መዝገብን ኪጠብዉ እዮም እሞ፣ ንህዝብታት ናብ ከረን ኪጽውዑ፣ ኣብኡ መስዋእቲ ጽድቂ ኬቕርቡ እዮም።

Tools 20. ብዛዕባ ጋድ ድማ በለ፣ እቲ ንጋድ ዘግፍሔ ብሩኽ ይኹን። ከም ኣንስተይቲ ኣንበሳ ይሰፍር፣ ቅልጽምን መንበስበስታን ይሰብር፣

Tools 21. ግደ ሓጋጊ ኣብኡ ተዐቚሩ ነበረ እሞ፣ እቲ ቐዳማይ ንርእሱ ሐረየ፣ ምስ ሓላቑ ህዝቢ መጸ፣ ምስ እስራኤል ኰይኑ ኸኣ ጽድቂ እግዚኣብሄርን ፍርዱን ፈጸመ።

Tools 22. ብዛዕባ ዳን ድማ በለ፣ ዳን ካብ ባሳን ዚዘልል ሽደን ኣንበሳ እዩ።

Tools 23. ብዛዕባ ንፍታሌምውን በለ፣ ንፍታሌም በረኸት እግዚኣብሄር ዝመልኦ፣ ጽጉብ ጸጋ እዩ፣ ንስኻ ንምዕራብን ንደቡብን ውረስ።

Tools 24. ብዛዕባ ኣሴር ከኣ በለ፣ ኣሴር በወዳት ብሩኽ፣ በሕዋቱውን ፍትዊ ይኹን። ኣእጋሩ ኸኣ ኣብ ዘይቲ ይጥለቕ።

Tools 25. መሸጐሪኻ ሓጺንን ኣስራዝን፣ ሓይልኻ ድማ ከም መዓልትታትካ ይኹን።

Tools 26. ዎ ይሹሩን፣ ነቲ ንረድኤትካ ብልዕልናኡ ኣብ ደበናታትን ኣብ ሰማያትን እተወጥሔ ኣምላኽ ዚመስሎ የልቦን።

Tools 27. እቲ ኣምላኽ ጥንቲ መንበሪኻ እዩ፣ እተን ዘለኣለማውያን ቀላጽሙ ድማ ኣብ ታሕቲ ኣለዋ፣ ንጸላኢ ኻብ ቅድሜካ ሰጐጎ፣ ኣጥፍእ፣ ድማ በለ።

Tools 28. እስራኤል ብህድኣት ይነብር፣ እቲ በይኑ ዘሎ ዔላ ያእቆብ ኣብ ምድሪ ስርናይን ወይንን እዩ፣ ሰማዩ ድማ ኣውሊ የንጠብጥብ።

Tools 29. ዎ እስራኤል፣ ብጹእ ኢኻ፣ ብእግዚኣብሄር ዝደሐነ ህዝቢ መን እዩ ኸማካ፧ ዋልታ ሓገዝካ፣ ንሱ ድማ ሴፍ ሓበንካ እዩ። ጸላእትኻ ኺግዝኡ እዮም፣ ንስካ ድማ ኣብ ልዕሊ በረኽቶም ክትረግጽ ኢኻ፣