Tools 1. ድሕሪ ኣቢሜሌክ ከኣ ቶላ ወዲ ጱኣ፡ ወዲ ዶዶ ካብ ሰብ ይሳኮር፡ ንምድሓን እስራኤል ተንስኤ። ንሱ ድማ ኣብ ከረን ኤፍሬም ኣብ ሻሚር ይቕመጥ ነበረ።

Tools 2. ንእስራኤል ከኣ ዕስራን ሰለስተን ዓመት ፈረደ፡ ሞተ ድማ፡ ኣብ ሻሚር ከኣ ተቐብረ።

Tools 3. ድሕሪኡ ድማ ያኢር ጊልዓዳዊ ተንስኤ፡ ንእስራኤል ከኣ ዕስራን ክልተን ዓመት ፈረደ።

Tools 4. ንሱ ሰላሳ ገልገል ኣድጊ ዚውጥሑ ዝነበሩ፡ ሰላሳ ደቂ ነበርዎ፡ ኣብ ምድሪ ጊልዓድ ዘለዋ ሰላሳ ኸተማ ኸኣ ነበራኦም፡ ንሳተን ክሳዕ ሎሚ ዓድታት ያኢር ይብሀላ ኣለዋ።

Tools 5. ያኢር ድማ ሞተ፡ ኣብ ቃሞን ከኣ ተቐብረ።

Tools 6. ደቂ እስራኤል ድማ መሊሶም ኣብ ቅድሚ እግዚኣብሄር ክፉእ ገበሩ፡ ንበዓላትን ንኣስታርቴታትን ንኣማልኽቲ ኣራምን ንኣማልኽቲ ሲዶንን ንኣማልኽቲ ሞኣብን ንኣማልኽቲ ደቂ ዓሞንን ንኣማልኽቲ ፍልስጥኤማውያንን ኣገልገሉ፡ ንእግዚኣብሄር ግና ሐደግዎ እምበር፡ ኣየገልገልዎን።

Tools 7. ሽዑ ዅራ እግዚኣብሄር ኣብ እስራኤል ነደደ፡ ኣብ ኢድ ፍልስጥኤማውያንን ኣብ ኢድ ደቂ ዓሞንን ከኣ ሸጦም።

Tools 8. ንሳቶም ከኣ በታ ዓመት እቲኣ ንደቂ እስራኤል ሳቐይዎምን ኣጥቅዕዎምን። ነቶም ኣብ ስግር ዮርዳኖስ፡ ኣብታ ኣብ ጊልዓድ ዘላ ምድሪ ኣሞራውያን ዚነብሩ ዅሎም ደቂ እስራኤል ድማ ዓሰርተው ሾሞንተ ዓመት ኣጥቅዕዎም።

Tools 9. እቶም ደቂ ዓሞን ድማ ምስ ይሁዳን ምስ ብንያምን ምስ ቤት ኤፍሬምን ኪዋግኡ ዮርዳኖስ ተሳገሩ እሞ፡ እስራኤል ኣዝዩ ጸበቦ።

Tools 10. ሽዑ ደቂ እስራኤል፡ ንኣምላኽና ሐዲግና ንበዓላት ኣገልጊልና ኢና እሞ፡ በዲልናካ ኢና፡ ኢሎም ናብ እግዚኣብሄር ተማህለሉ።

Tools 11. እግዚኣብሄር ድማ ንደቂ እስራኤል በሎም፡ ካብ ግብጻውያንን ካብ ኣሞራውያንን ካብ ደቂ ዓሞንን ካብ ፍልስጥኤማውያንንዶ ኣየድሐንኩኹምን፧

Tools 12. እቶም ሲዶናውያንን ኣማሌቃውያንን ማኦናውያንን ምስ ጠቕዑኹም፡ ከኣ ናባይ ተማህለልኩም እሞ ካብ ኣእዳዎም ኣድሐንኩኹም።

Tools 13. ንስኻትኩም ግና ንኣይ ሐዲግኩም ንኻልኦት ኣማልኽቲ ኣገልገልኩም፡ ስለዚ ድሕሪ ደጊም ኣየድሕነኩምን እየ።

Tools 14. ብጊዜ ጸበባኹም ኬድሕኑኹምሲ ናብቶም ዝሐሬኹምዎም ኣማልኽቲ ደኣ ኼድኩም ተማህለሉ።

Tools 15. ደቂ እስራኤል ድማ ንእግዚኣብሄር፡ በዲልና ኢና፡ ሓንትስ በዛ መዓልቲ እዚኣ ደኣ ኸተድሕነና ንልምነካ አሎና እምበር፡ ከምቲ ዚሐይሽ ኰይኑ እተራእየካ ዅሉ ግበረና፡ በልዎ።

Tools 16. ሽዑ ነቶም ጓኖት ኣማልኽቲ ካብ ማእከሎም ደርብዮም ንእግዚኣብሄር ኣገልገልዎ። ነፍሱ ኸኣ ብመከራ እስራኤል ተጨነቐት።

Tools 17. ደቂ ዓሞን ድማ ብኣውያት ተአኪቦም ኣብ ጊልዓድ ሰፈሩ፡ ደቂ እስራኤልውን ተአኪቦም ኣብ ሚጽጳ ሰፈሩ።

Tools 18. እቶም ህዝቢ ድማ፡ እቶም ሹማምቲ ጊልዓድ ነንሓድሕዶም፡ ምስ ደቂ ዓሞን ኪዋጋእ ዚጅምር ኣየናይ ሰብኣይ እዩ፧ ንሱ ነቶም ኣብ ጊልዓድ ዚነብሩ ዅሎም ሓለቓ ይኹን፡ ተበሃሀሉ።